Escritu al ALSA

La nuesa asociación bien de presentar, dientro d'una campaña entamada pol grupu 12 meses, 12 causes de feibu, un escritu a la dirección de ALSA pidiendo'l cumplimientu de la llei de toponimia n'Asturies.

A la dirección d'ALSA n'Asturies.

El grupu ALSA, que tuvo'l so orixe n'Asturies y caltién llazos bien importantes con esti país, incumple la llei al nun usar la toponimia oficial asturiana, na so web, nos autobuses que circulen por Asturies, paraes del bus, billetes, públicidá, etc.

Ye casu bien importante, pues la empresa ye la concesionaria de munches llinies y polo tanto ta faciendo servicio públicos sobre los que tien la esclusividá.

Reclamamos, poro - como asociación defensora de la llingua y cultura asturianes-, al traviés d'esti correu, que cumplan col usu de la toponimia oficial en tolos ámbitos y l'usu del asturianu na so páxina web, n'igualdá de condiciones que les demás llingues.

Munches gracies pola so atención.

Mª Jesús Varela, Presidenta de l'asociación cultural AYDA

Escursión a la cascada del Xiblu

El Xiblu, ablucante, tuvimos la suerte de vela con muncho agua, como podeis comprobar pola niebla que se aprecia al rodiu d'ella y que ye por mor del agua qu'aventaba pa los llaos, ehí ya chiscaba cantidá, nun ta entera, falta-y un trozu de la parte más alta, pero yera abondo complicao xubir más. Tou esto vivímoslo, en direutu, un grupu de xente que mos animamos a dir el pasau domingu, día 14, hasta'l conceyu Teberga, primero dimos un pasein pola Plaza pa ver el mercau qu'ellí se facia, y llueu fasta el Xiblu, pasando pol fayeu de Montegrande, la tercera mancha forestal d'Asturies, dempues de Muniel.los y Peloño.
El día, comu podeis ver nes semeyes, d'impresión y eso que daben agua asgaya, menos mal que nun-y ficimos casu al tiempu...

Dos semeyes del ríu, podíamos poner más pero meyor que vos animeis y vengais con nos a la prósima, que ya será en Xineru.

Que biesca más guapa, recomendao... escursión curtia y cenciella. Los más guapos del grupu, bueno ye broma, que llueu hailos mal tomaos, estos yeramos los que más retrasaos dibamos, tanta semeya fai que a ún se-y pase'l tiempu ensin enterase...y colo que había que ver...

Ruta del Beyu de Pen

Estes son les semeyes que ficimos na Ruta del Beyu de Pen, nel conceyu d'Amieva, na escursión que ficimos la fin de selmana del 17 d'esti mes, la que ta xusto embaxu l'escritu ye la d'un árbol cola forma del nuberu o ñuberu, comu más vos pete, que ye dalgún de los seres mitolóxicos que vos podeis atopar nel camín.
Anque'l día tuvo daqué lluviosu averámosnos fasta Santillán y llueu hasta Pen dolce persones ente grandes y pequeños, que pasamos un día en contautu cola ñatura, nun entornu maravillosu, al llau del ríu El regatu, que coles lluvies d elos caberos díis diba con agua abondo pa poder esfrutalu. Ehí vos queda una muestra, esfrutaila. Y ya sabeis la prósima el día 14 de Payares a la cascada del Xiblu, en Teberga.

Escursiones d'AYDA

Un añu más entamamos coles escursiones d'AYDA, enfotaos nel conocimientu del nuesu paixase, los monumentos, tanto naturales comu arquiteutónicos, y la nuesa xente. Esti ye'l programa pa los dos prósimos meses.
El día 17 d'esti mes d'Ochobre vamos dir al conceyu d'Amieva, y facer, si'l tiempu lo permite, la ruta de Beyu Pen, saldráse d'Uviéu a les 10 hores y taremos de vuelta pa eso de les 19 hores a más tardar.
La ruta ye cenciella y curtía, nuna pallabra pa tolos públicos.

Y la prósima va facese el día 14 de Payares y va ser a la cascada del Xiblu nel conceyu de Teberga, pero d'ella falaremos más alantre.

Si vos peta dalguna escribi-ynos al correu.

Participación nel 25 Mayu

PARTICIPACIÓN NEL ACTU CONMEMORATIVU DEL 25 DE MAYU


La presidenta de l’Asociación Cultural AYDA, Mª Xesús Varela, convidada por Unidá Nacionalista Asturiana, participó xunto con otros poetes nun actu políticu-lliterariu conmemorativu del 25 de Mayu cola llectura del so poema Arenga.

ARENGA


Miráilos: tán ehí.
Callaos, diciendo ensin dicir,
esperando…

Sí, siguen ehí, ¿nun sois a sentilos?

Otru mayu más: doscientos dos.
Y como caen les fueyes del almanaque,
como’l “nun me quier” de les margarites,
vamos dexando emprobecer
l’arbol de la vida
d’un pueblu:
del nuesu pueblu.

Muerren la voz,
la fuercia,
les pallabres…
¿Nun queda chiplíu nos gargüelos
pa glayar
-españíos de gritu-
la rabia contenío?
( ¿o ye que nun la hai?)

¿Nun queden cuerpos
p’amosar
na cai
nes places
nos montes y vallines…
… nes autopistes
nos parques eólicos,
nos ermos industriales del país,
el xeitu y el calter
de Xuaca y de María?

Yá nun son les franceses,
yá son otres les armes ofensives.
¿Namás se mueve Asturies
cuando aporten cañones ?

Podemos caltener l’alcordanza,
porque nun ye melecina
l’escaezu.

Mentanto,
-testigos de la hestoria-
ellos siguen ehí,
esa güestia infinita
qu’espera al otru llau:
ánimes enfotaes
nel aldu de los vivos
que-yos faiga biltar
l’aliendu de los texos,
l’aire, l’agua, la tierra
y la madera de los Montes Sacros.

Otru mayu más: doscientos tres…
… y Asturies, ¿tien futuru?

María Jesús varela

II Xornaes d'estudiu en Ponga

Esti fin de selmana pasau cellebráronse en Beleño les II Xornaes Culturales de Ponga, tamién nomaes como II Xornaes d'estudiu, al rodiu d'estes xornaes tuvimos un bon garrapiellu de xente(30 de fuera'l conceyu) nesti conceyu ponguetu falando de temes interesantes pal espoxigue d'esti país de nueso, equí queden unes semeyes como muestra de los ponentes que n'elles tuvieron a los que dende AYDA enxamás mos cansaremos d'agradece-yos la so collaboración con nos, asina como al grupu de consumu de Xixón ECOCESTU pola so presencia y la so orixinal puesta n'escena de la so ponencia sobre consumu ecolóxicu, al traviés d'un monologista perconociu como ye "Cellero". Sólo convidar a la xente que nun foi a que s'avere y esfrute de les charres y de la excelente comida y tratu de la Fonda Ponga.
El prósimu añu ellí taremos.












































Les semeyes son, la primera de Xandru Martino, escritor que falo de "L'aprovechamientu económicu na toponimia de Ponga"
La segunda del monologista Cellero, que fizo una perbona interpretación col grupu de consumu ecolóxico ECOCESTU de Xixón.
La tercera es de, entamando pola manzorga, Norberto Ortega, técnicu de CADAE 8coordinadora asturina de agricultura ecolóxica)que falo de "Agricultura ecolóxica, fuente d'emplegu" Jaime Santos que mos cunto como funciona ECOCESTU, xunto con Cellero, y Germán Abad miembru de AYDA.
Y la cuarta y última, tamién de la manzorga pala mandrecha, David Rivas, economista y profesor en la UAM, que falo de "Volver al campi:La custión rural, un debate inaplazable" Mª Jesús Varela, presidenta d'AYDA, y Candido Vega, alcalde de Ponga.

II Xornaes d'estudiu

Otru añu más, y ye'l segundu, facemos les Xornaes Culturales o d'Estudiu nel conceyu de Ponga, más exautamente na so capital Beleño, ehí vos dexamos el programa pa que lu veáis, si tais interesaos ponéivos en contautu con nos y taremos encantaos de desplicavos cualesquier entruga que vos pete.

Sabadu 24 d’Abril

11 hores:
Apertura de les xornaes.
11,30 hores:
“Volver al campu: La custión rural, un debate inaplazable”. Por David Rivas, economista, profesor de la Universidá Autónoma de Madrid.

Alderique

Descansu y xinta

17 hores:
“Agricultura ecolóxica, fuente d’emplegu”. Por Norberto Ortega Gómez, técnicu de CADAE (Coordinadora asturiana de agricultura ecológica).
Participaran dalgunos miembros de ECOCESTU, grupu de consumu de productos ecolóxicos.

Alderique

Descansu y Cena

A les doce la nueche baillaráse la Danza Prima.

Domingu 25 d’Abril

11,30 hores:
“L’aprovechamientu económicu na toponimia de Ponga”. Por Xandru Martino, escritor.

Alderique

13 hores:
Presentación de la revista asturiana Atlántica XXII por Xuan Cándano, director de la revista y Nacho G. Pandavenes

13,30 hores: Pieslle de les xornaes.


Precios por persona:
Xinta 15 €
Agospiu, almuerzu, xinta y cena 45€.

Información ya reserves
Aydastur@hotmail.es
O nel tfnu: 617298966

Cellebración del 8 Marzu

Delles muyeres de la Executiva d'AYDA fueron convidaes a asistir a un conceyu en Cataluña pa cellebrar el día la muyer trabayadora. Nel actu participaron muyeres de tol estau: Cataluña, Lleón, Valencia, Asturies, Madrid, etc.. Entamaron el vienres 5 na Plaza de Cataluña (Barcelona), el sábadu les muyeres aconceyaron en Sitges durante tol día y el domingu acabaron con una xinta de hermandá. Esti primer conceyu de muyeres rellacionaes colos medios de transporte dexó mui bon gustu y decidiose dayos continuidá nel tiempu.

Sofitu Pepe'l Ferreiru

Dempues de lo asocedio a Pepe'l Ferreiro y la so fulminate y vergoñosa destitución por nun amosar servilismu pa colos encargaos del caltenimientu ya espoxigue de la nuesa cultura, esta asocición cultural mando'l siguiente escritu de sofitu a la plataforma d'apoyu.

Conociendo'l casu vergoñosu de la destitución fulminante de Pepe'l Ferreiro y les circunstancies que l'arrodien, AYDA, como asociación esmolecía pol patrimoniu cultural d'Asturies, manifiesta'l so apoyu al mesmu y el rechazu a los métodos emplegaos, solicitando asina mesmo la reincorporación de Pepe al so puestu de direutor del Muséu Etnográficu de Grandas.

Por too lo qu'antecede, AYDA solicita ser incluyía como firmante'n cualisquier manifiestu empobináu a los fines mentaos.

Un cordial saludu,

la Xunta Directiva.

Protesta en Sotu d'Agües

Estes son les semeyes de la escursión protesta que ficimos el 18 d'Ochobre nes foces del Llaimu, o ruta del Alba, ya sabeis que fuimos a sofitar cola presencia de nueso la marcha organizada por IX, a la escontra del hormigonao d'esti perguapu camín, ellí tuvimos unos pocos en representación d'AYDA, y pa que podais esfrutar, sinon col viaxe coles vistes, equí os dexamos unes poques semeyes del llugar y del actu.

El 18 d'Ochobre xornada de protesta

Esta asociación acaba d'unviar un escritu, a tolos medios, sofitando la marcha escontra l'hormigonau de les Foces del LLaimo, mal conocida como ruta l'Alba, ponémoslu equí embaxo pa que tengáis accesu toos y toes a él. Nos diremos en coche particular y saldremos d'Uviéu a eso de les 9,30 hores, asina que si daquién quier apuntase solo tien qu'escribinos a aydastur@hotmail.es y ya vos dicimos onde quedamos. Nuna pallabra camudamos l'escursión d'esti mes por esta salida revindicativa.

L'asociación cultural AYDA quier mostrar el so sofitu a la marcha escontra del hormigonao de les Foces del Llaimo, o Ruta del Alba, entamada por IX nel conceyu de Sobrescobiu’l próximu domingu día 18 en Sotu d’Agües.

Dende esta asociación cultural vemos con esmolecimientu como s’intenta enllenar d’hormigón tolos caminos de montaña asturianos, cola esculpia de dotar de meyores infraestructures a los veceros pero col finxu únicu de facilitar l’accesu a los turistes y potenciar asina’l turismu más depredador col ecosistema y con menos interés pola conservación mediuambiental. Dende AYDA apoyaremos toles iniciatives, partan de quien partan, encaminaes a protexer, curiar y poner en valor les nueses costumes, vezos y protección de monumentos, tanto naturales, como ye l’actual casu, como de cualesquier otru calter. Poro facemos un llamáu a tolos asociaos y simpatizantes de nueso, asina como a cualesquier persona con un mínimu d’amor pola natura, pa facer fuercia cola presencia esti domingu a partir de les 11 la mañana nel pueblu coyán de Sotu d’Agües.

CELEBRACIÓN DEL 25 DE MAYU

CHARRA-ALDERIQUE NEL 25 MAYU

L’asociación cultural AYDA conmemoró l’aniversariu d’esa fecha hestórica con una charra de Carlos Moreno titulada “Remembrando’l 25 de Mayu”, como posibilidá de fecha alternativa pal Día d’Asturies, y analizáronse les diferencies con respeutu a l’ actual, 8 de Setiembre. Nel alderique afondóse nes estremaes carauterístiques y orixen de les dos feches.
Darréu siguió l’alderique na espicha organizada nuna sidrería d’Uviéu onde tuvo llugar l’actu.

Escursión a L.Lagos Saliencia

El 27 fízose una escursión a los L.lagos de Saliencia (Somiedu) na que disfrutamos d'un día marvillosu y unes vistes impresionantes, como ye vezu vamos dexavos unes semeyes del viaxe pa que se vos pongan los dientes llargos, o meyor pa que vos entren ganes de venir con nos al restu d'escursiones, prometemos munches más...

En pocu más de dos hores vimos los tres l.lagos de la parte de Saliencia (La Cueva, Cerveriz y Calabazosa o Negro) y dempues de xintar al llau del Cerveriz dalgunos cruzamos los Albos y fuimos hasta el llugar onde se ve el L.lagu más grande d'Asturies, el L.lagu del Val.le, que tamién ta equí asemeyau. y les otres dos semeyes son d'una parte del grupu nel entamu la ruta y del grupu enteru nel pueblu de Saliencia.

Escursión de Setiembre

Entamos de nuevo coles escursiones, vamos dir n'autobús, si ye que semos a llenalu, a l'altu La Farrapona y dende ellí, nun comodu paseu, fasta los tres llagos de Saliencia, pa los mas decidios, o con más ganes de caminar, pasaremos, al llau de los Albos fasta ver el L.lagu del Val.le, les vistes son impresionantes y les semeyes que se pueden sacar tamién.

La escursión ye pa tolos públicos y mas na se necesita que calzao adecuao y llevar ropa d'abrigu y d'agua por si'l tiempu nun acompañara, anque nestes feches entá hai bon tiempu, pero hai que dase cuenta que vamos tar a 1.600 metros d'altor ya incluso dalgo más. Calca-y enrriba el cartelu y vereis l'horariu y d'onde se sal.

Animaivos a pasar un día en plena ñatura nun de los llugares más guapos d'Asturies.

Celebraes les Primeres xornaes d'estudiu

El pasáu fin de selmana, celebramos en Beleño, capital del conceyu de Ponga, les Primeres Xornaes d’estudiu, entamaes por nos y cola collaboración l’ayuntamientu de Ponga.
Pode dicise que les xornaes foron un ésitu de participación, so tou de la xente del conceyu, que s’averaron fasta’l local onde se facien en númberu superior, en tou momentu, a les venti persones, llegando na tarde del sábadu a sobrepasar les venticinco persones asistentes.
Ye de tener en cuenta la bona acoyida ente los veceros que s'averaron y participaron de los alcuentros, falando, entregando y cuntando anécdotes y vezos del so conceyu so los temes trataos. Pola parte de nueso quedamos comprometíos pal próximu añu, y mui agradecíos pol tratu recibíu, tantu pol ayuntamientu como polos veceros y veceres de Beleño.

Tamién foi de destacar la participación nel baille la danza, anque equí paez qu'a los paisanos costo-yos daqué más y quedaron más muyeres qu'homes, con eso y con tou tendremos de siguir incluyendo esti tipu d’actos pa zarrar el sábadu porque ye una bona forma de participación y de xuntura.

Sólo queda agradecer la collaboración de los ponentes, Cristobo García, Berto Peña y Roberto González Quevedo, colos que deprendimos y esfrutamos de dos díes mui especiales.

Escursión a Samartín d'Ozcos

El Prósimu domingu día 1 de Febreru vamos dir d'escursión a Samartín d'Ozcos y dende ellí faer una ruta del Monte Marón y Ascuita. (9 Km. pocu más de dos hores caminando)
Saldremos en coches particulares, a les 9 la mañana de l'entronque de les cais L'Argañosa y Martínez Cachero, pa llegar a Uviéu a eso de les 8 la tarde.
Si tas pol llabor solo tienes qu'escribinos a aydastur@hotmail.es, o llamar al teléfonu 617298966 y entrugar por Ezequiel, nun ye imprescindible tener coche, pero si tar seguros de los que sois.

Asturianu Oriental

ASTURIANU ORIENTAL

L’Asturianu oriental ye una variante del idioma asturianu que comparte dalgunes carauterístiques col “montañés” de Cantabria- esti más prósimu al castellán- con carauterístiques qu’anguañu se dieron nesta última llingua. Según los llingüistas esti dialeutu asturianu fálase ente’l ríu Seya y la llende con Cantabria, aunque tamién s’adientra nesta comunidá.

Rasgos:
- Zarramientu de la –a final en –e: puerte, vieye, cerque (puerta, vieya, cerca)
- Zarramientu (en dalgunes zones más que n’otres) de la –e en –i: llechi, h.uenti (lleche, fonte)
- Plural en –as : las cabañas, las neñas, los parllamentaristas (les cabañes, les neñes)
- Aspiración de la “F” llatina: h.ariñe, ah.umau, h.itu (fariña, afumáu, fitu)
- Les pallabres qu’entamen por n- faenlo en ñ-: ñuestru, ñuevas (nuesu, nueves)
- Posesivos mi, tu, su, ñuestru, vuestru (mio, to, so, nuesu, vuesu)
- Pronomes átonos mi, ti, diomi, frayóti (diote, frayóte)
- Terminación del neutru en –u: materie primu, h.ariñe blancu (materia primo, fariña blanco)
- Camuda la forma bue por güe: güenu (bonu)
- Aspiración de la “F” nos diptongos en “ue” : h.uercie, h.uenti (fuercia, fonte)
- Conxugación irregular de dalgunos verbos como el ser: ero llaniscu (soi llaniscu) o Lluis e llaniscu (Lluis ye llaniscu)

Nota: Na fastera más occidental d’esti dominiu consérvase’l plural femenín en –es (les cases), pero conviértese en –as na parte central y oriental. Probatíblemente n’otres dómines “les cases” pronunciábase más al oriente (la prueba ye’l topónimu Llanes)

Faite sociu/a

Unvíamos esti cartafueyu y pondrémosnos en contautu pa informate de quien semos, y tou lo que quieras saber, y por supuestu, encantaos de les ideges que se te ocurran pa poner en praútica.

Calendariu a la venta.

Decivos que acabamos de sacar a la venta un calendariu, con semeyes de dalgunes de les rutes que ficimos nos caberos meses, y la desplicación de como llegar fasta esi llugar.

El preciu ye de 5 euros y val pa sofitar a esta asociación.

Escursión a La Pornacal

Esta foi la cabera escursión fecha por AYDA, a la Braña de La Pornacal (Somiedu), anque nun entamu taba anunciada pa los llagos de Saliencia, pero la ñeve torgonos dafechu'l dir ya que yera imposible que subiere l'autobus fasta l'altu La Farrapona, asina que tuvimos que camudar de ruta y averámosnos fasta'l pueblu de Vil.lar pa dende ellí dir fasta La Pornacal y, los más decidios, los de la semeya de delantre la cascada del Corralón, xubir a la braña Viel.la ya con una bona nevada.

Otru grupín de xente prefirio baxar hasta'l pueblu y xintar ellí, y ye que dientro de les escursiones d'AYDA siempres hai opciones pa tolos gustos, al final lo importante ye pasalo bien y conocer el nuesu país y los nuesos vezos, asina como deprender a dixebrar los distintos dialeutos d'esta llingua de nueso.

La prósima escursión sedrá pa la fastera más occidental d'Asturies, pa conocer un pocoñín la fala Eo - Naviega, pero eso sedrá otra hestoría, eso si, tai sollertes porque daremos nuncía de tou ello nesta páxina y colocando cartelos.

Escursión a les Foces del Pino

Estes son semeyes de la escursión del mes d'Ochobre a les Foces del Pino, nel conceyu d'Ayer,declaraes monumentu natural, onde prauticamos la manera de falar dela xente la fastera y conocimos la so forma de vida y la fauna y flora d'esti guapu conceyu. Tou ello desplicao por persones conocedores del entornu, ye esta otra forma de deprender l'asturianu, viendo les diferencies ente les distintes variantes dialeutales, a la par que conocemos l'entornu y la ñatura.

CONCEYU D’AYER: RASGOS LLINGÜÍSTICOS

ESTRAGAL
El conceyu d’Ayer ye ún de los de mayor estensión del país, con más de 376 km2, de los que namái tán poblaes les fasteres que tan al par de les distintes víes de comunicación. Ta dividíu en 18 parroquies: Beyo, Bo, Cabanaquinta, Caborana, Casomera, Conforcos, Cuergo, El Pino, L.lamas, Morea, Murias, Nembra, Piñeres, Serrapio, Soto, Pel.luno, Santibanes de la Fuente y Vega. Anguaño el conceyu anda al rodiu de los 13.200 habitantes, siendo ún de los conceyos de la zona central d’Asturies que más perda tuvo nos caberos 20 años.
RASGOS LLINGÜÍSTICOS.
L’Asturianu faláu nel conceyu d’Ayer pertenez al tueru de la variante centro-sur del idioma y que garra los conceyos d’Ayer, L.lena, Mieres, Riosa y Morcín. Delles de les notes carauterístiques de la Llingua Asturiana n’Ayer son:
· L’usu de la “l.l” onde n’otres fasteres ye ll: l.luna, l.linu, l.levantar, l.lambión
· Metafonía: Esti fenómeno llingüísticu tamién se da con otres particularidaes n’otres zones d’Asturies. Consiste en que cuando una palabra termina –u la vocal tónica de la sílaba anterior zarra un grau: asina –a>e; -e>i; - o>u. exemplos: palu > pelu; besu>bisu; mineru>miniru; silicosu>silicusu. Ye curiosu’l casu de Felechosa, onde la vocal tónica zarra un grau, mentanto la palabra final sigue terminando n’ - O. Por exemplu: gurdo, en cuenta de gurdu; iste, en cuenta d’ isti; puilo envede puilu…
· Resultaos –y / - ye / -lly / -yos. Nel conceyu d’Ayer, el pronome personal átonu –y, úsase indistintamente cola forma – lly y cola forma – ye. Ésta última dase nes parroquies de la parte riba del conceyu: Conforcos, L.lamas, Casomera y El Pino Exemplos: Compró-y / Compró-lly/ Compró-ye; di-y / di-lly /di-ye. Pal plural gástase el –yos lo mesmo qu’en bona parte d’Asturies
· Plurales femeninos –es/- as. Les parroquies de la parte alta del conceyu, la fastera más al sur empleguen los plurales femeninos n’ –as (Parroquies de Murias, Casomera, Santibanes de la Fuente (namás en Yanos) y El Pino) Exemplu: casas, vacas, fabas. Esta carauterística compártela tamién col conceyu vecín de L.lena, onde más arriba de la parroquia de La Pola, tamién se faen terminaciones d’esta traza. Nel restu del conceyu fáense terminaciones –es(Vaques, cases, palombes, fabes)

· Perda xeneral de la – T - llatina –ATA>ada>á: Esti rasgu compártelu con tolos conceyos de la fastera central d’Asturies, tanto los denomaos conceyos, como tolos del Valle’l Nalón, parte d’Uviéu y del de Sieru. Exemplu: tená, mayá, guiyá, frayá.
· Perda de la –D- ente dos vocales: Exemplu: maera, trabayaor, cavaor, panaíru, . En dellos sitios dase tamién cola –B - Ye’l casu de los pueblos de la parroquia d’El Pino (El Pino, La Pola) y Casomera. Exemplu: L.lobu > L.lubu > L.lúu; Cebol.la > Ceol.la
· Los grupos –NN- y –MN- del llatín, conviértense en – N . Exemplu: pena, cabana, esquenu, penasca,
· Caltenimientu de la –e paragóxica, o lo que ye lo mesmo, el desendolcu de la lletra – e dempués de –r o –l. Como por exemplu: calentare, querere, muyere, alendare, colare, querere…
· Usu del neutru de materia. Ye una carauterística propia del asturianu central que nesti conceyu entá se caltién con muncha fuercia. Exemplu: carne asao; sangre negro; la maera colócalo, l’agua tiralo,